منى وأحمد واقفين في عز الظهر علي الكوبري
منى: "برومانسية" شايف النجوم يا أحمد
أحمد...: نجوم ايه بس في عز الظهر دا أنا الشمس حرقت قفايا
...
منى: الله ياأحمد بص السحابة اللي هناك دي اللي عليها العصافير
أحمد: لا والله ياحبيبتي أنا مش شايفها بس شايف دخان عربيات خنقني
منى: يووووووووووووه يا أحمد خليك رومانسي شوية
أحمد: رومانسي إيه بس وأنتي مخرجاني في عز الظهر كده أنا الشمس كلت وشي وقالت أنا شبعت
منى: انت مش بتحبني والا ايه
أحمد: ياستي بحبك
منى: لأ انت كذاب انت مش بتحبني
أحمد: يعني أولع في نفسي بجاز عشان تصدقي اني بحبك
منى: "والدموع علي خدها" لا يا أحمد أنت تغيرت خالص
أحمد: ياحبيبتي والله بحبك
منى: لأ يا أحمد متصلحش اللي أنت عملته
أحمد: وهو أنا كنت عملت إيه بس
منى: " تعيط" اهئ اهئ اهئ
أحمد: بتعيطي ليه دلوقت
منى: أحمد طلقني يا أحمد
أحمد: هو احنا لسة اتجوزنا عشان اطلقك
منى: يعني كمان مش عايز تطلقني
أحمد يشد في شعره: يادي الليلة السودا أنا ايه اللي خرجني بس
منى: كمان خليتها ليلة سودا.. يعني أنا اللي خرجتك غصب عنك
أحمد: ياستي مش قصدي. بصي أنا مش هرد عليكي عشان مانتخانقش
منى: للدرجة دي قرفان مني
أحمد: "وشه يحمر من الغيظ" يعني انتي عايزة تتخانقي وخلاص
منى: يعني أنا نكدية يا أحمد
أحمد: لأ...... أنا
منى: انت بتاخدني علي اد عقلي
أحمد: حقك عليا وادي رأسك ابوسها
منى: ياسلام كده بكل بساطة
فجأة يقف أحمد علي سور الكوبري ويرمي نفسه في الميه
منى: تفتكر يا أحمد اني كده هسامحك